११ आश्विन २०७८, सोमबार

मृतक संख्या १० हजार नजिक



साउन २० ,काठमाडौं।
नेपालमा कोरोना संक्रमण भई ज्यान गुमाउनेको संख्या झन्डै १० हजार नजिक पुगेको छ। आज देशभरबाट ३५ जनाको मृत्यु भएसंगै मृतक संख्या ९ हजार ९ सय ५७ पुगेको छ। स्वास्थ्य तथा जनसंख्या मन्त्रालयले कोरोना सम्बन्धि अद्यावधि जानकारीमा यसो उल्लेख गरेको छ।

मन्त्रालयको वेब साइटमा अपलोड गरिएको जानकारी अनुसार गत २४ घन्टामा १६ हजार २ सय ९८ जनाको परिक्षण गर्दा ४ हजार १ सय ७ जनामा संक्रमण पनि देखिएको छ। ति मध्ये ४ हजार ९ सय ४४ जनाको अण्टिजेन परिक्षण गर्दा १ हजार १ सय ३२ जनामा र ११ हजार ३ सय ५४ जनाको आरटि-पिसिआर परिक्षण गर्दा २ हजार ९ सय ७५ जनामा संक्रमण पुष्टि भएको छ। योसंगै देशभर कुल संक्रमित संख्या ७ लाख ५ हजार ७२ पुगेको छ।
यता पछिलो २४ घण्टामा १ हजार ५ सय ३५ जना कोरोना मुक्त भएका छन्। हाल कोरोना संक्रमण मुक्त हुनेको संख्या ६ लाख ६१ हजार ६ सय ५१ पुगेको मन्त्रालयले जनाएको छ। मन्त्रालयका अनुसार ३३ हजार ४ सय ६४ जना सक्रिय संक्रमित रहेका छन् भने ३ सय ७८ जना क्वारेण्टाईनमा छन्। हाल सम्म देशभर ३६ लाख ४४ हजार ४ सय ७२ जनाको पिसिआर गरिसकिएको स्वास्थ्य मन्त्रालयले जानकारी दिएको छ। हाल १ सय ५६ जना भेण्टीलेटरमा उपचाररत रहेका छन्।

नेपालमा सक्रिय संक्रमित दर ४.७५ प्रतिशत छ भने निको हुने दर र मृत्यु हुने क्रमश:९३.८४ प्रतिशत र १.४१ प्रतिशत रहेको मन्त्रालयले जनाएको छ।